لعب چعاب
المدار الاخباري -
شاكر جواد
في كل دول العالم المحترم و المتحضر ينتخب الناس رئيس الجهاز التنفيذي للدولة سواء كان رئيسا للجمهورية او رئيسا للوزراء بالاقتراع المباشر و بعد ان يستمعوا له و هو يشرح برنامجه الانتخابي بالتفصيل وكيف سينفذه عند استلامه المنصب. و يفاضل الناس في النهاية ليس بين المرشحين أنفسهم بل بين برامج المرشحين عند الادلاء باصواتهم لأن البرنامج هو المهم و ليس الشخص .. و بعد أن يفوز المرشح الافضل و يستلم المنصب يقوم رئيس الوزراء المنتخب بأختيار كابينته الوزارية بنفسه كما يختار مدرب فريق كرة القدم لاعبيه و بالتأكيد سيجلب المدرب افضل اللاعبين و ليس 'ياهو الچان' .. و كما لا يمكن لأحد ان يفرض على المدرب لاعبا لأنه سيفشل في مهمته فكذلك لا يمكن فرض وزير على رئيس الوزراء لأنه سيفشل في اداء مهمته .. و بما أن منصب الوزير هو منصب سياسي بحت يقوم الوزير من خلاله بالتأكد من تطبيق سياسة و رؤية الحزب الفكرية اثناء تنفيذ البرامج الوزارية فأن من اول اولويات الوزير هو تعيين وكلاء و مدراء عامين كفوئين من ذوي الخبرة و الممارسة و التدرج الوظيفي (تكنوقراط) حتى يضمن ان يكون الاداء مهنيا و مقتدرا .. خل ننطيكم مثل من دولة حديثة عهد بالديمقراطية حتى تستوعبون المذكور .. رئيس وزراء هاي الدولة ما انتخبته الناس و لا متوقعين يصير رئيسهم خاصة ورة ما طلع واحد من جماعته يوصفه بأنه كان أغبي واحد في الحلقة الحزبية الي كان يديرها هذا الشخص .. بس تاليها جابوه البرلمان كحل وسط لان يريدون يمنعون ولاية ثالثة لرئيس الوزراء الي كان قبله رغم انف الناخبين.. هذا رئيس الوزراء الجديد راد يبدل وزيرة عنده هو مسؤولها المباشر و تقييمه لادائها كان دون المستوى المطلوب فأقالها و عين واحد ببدالها بس البرلمان ما خلاه و كالوله بالحرف الواحد: يعجبك .. مايعجبك هاي باقية غصبا عليك دبر حالك.. وهاي الوزيرة رادت تنهي خدمات مدير عام فاشل عدها .. ماكدرت لان التيار السياسي الي يدعمه قوي و مسيطر بالشارع .. شفتوا العالم وين و احنا وين ..
الخلاصة :
- رئيس الوزراء لا برنامج عنده و لايحزنون برنامجه الوحيد يوزع لفات كص ثواب 'لأبا' عبد الله على الزوار و المشاية و هو متصنع ابتسامة مضحكة حتى يزيد قاعدته الشعبية و الانتخابية للمستقبل
- وزيرة الصحة طلعها رئيس الوزراء و ما طلعت ..و باقية رغم انف رئيس الوزراء و الشعب الي ما يريدها لأن الوضع الصحي للبلد ديسوء يوم بعد يوم و هي غير مؤهلة لاستلام منصب بهذا المستوى
- مدير عام احد الدوائر طلعته الوزيرة لسوء اداءه و فشله و كونه غير مؤهل اساسا لهذا المنصب و ما يقبل يطلع و مستند على التيار الديني السياسي الي يدعمه .. الوزيرة عايفة الدائرة من وراه و ما تدعمها و يطلع بالتلفزيون يحجي و هو ابو الراهي !!!؟؟؟
لك و الله حتى لعب الجعاب بيها اصول اكثر مو خزيتونا شلون ويه هالطركاعة هاي ...حتى ابو خيمة الزركة يبدو مل من عدنا و عافنا و لسان حاله يقول طبهم مرض
|