الوضعية شهد

أحلى شي عدنا بوزارة التربية بالعراق هو وزير التربية، بس !
ماكو شي يسوى بهاي الوزارة ، حتى لو تنشال هاي الوزارة التعليم ما يتأثر، هو وينه التعليم، آني أگول لك راح تتأثر نشرة الأخبار لأن تصريحات وزير التربية راح تختفي، وراح تتأثر شغل المطابع إللي تاخذ عروض وهمية لطباعة الكتب المدرسية إللي عبالك شعر البنات، حطوها بمخازن ماخذة رطوبة، و...بح إحتفت الكتب. وراح تتأثر معامل النجارة إللي ماخذة بزنس وي وزارة التربية، رحلات إكس إكس إكس لارج ، كل رحلة يگعد عليها وهمين بيها خمس طلاب محظوظين والبقية عالجودلية. وأتذكر بالزمانات...زمانات حيل من إنعدم وزير التربية طلعت نكتة چانت تعتبر تخرب من الضحك بحسب القياسات النكتوية مال ذاك الوكت ( إي أشوية ماخذ فيروس الجعفرة )، نكتة تگول الناس كلها صاروا بلا أخلاق وما متربايين...ليش ؟ وأنت تصفن بوجه إللي يحچي النكتة وتنزل حواجبك ولازم تتعجب وتصفن برهة أو هنيهة وبعدين تگول ' ليش ' ؟ حتى يجاوبك ويگول لك ' مو وزير التربية عدموه !' وثنيناتكم تخربون ضحك لأسباب وطنية، وطبعاً چانت من شروط هاي النكتة إن لازم تنحچي بين ثنين بس، وبمكان منعزل ، ولازم إللي يسمع النكتة يتأكد إن إللي يحچي النكتة ما شايل قلم بجيب قميصه، لأن كل إللي راحوا بالزلگ راحوا بسبب قلم بجيب الصديق إللي يحچي النكتة أو يفتح ويانا موضوع وبعدين يطلع هذا مسجل مو قلم، وأكو إحتمال تاريخي قوي إن صباح السهل راح للزلگ بنفس الطريقة.

وين رباط الحچي بهاي النكتة ؟ ما أعرف بس جبناها على حال وزارة التربية، وزارة لا تربية ولا تعليم ولا سيستم ولا شي، ماكو غير شعارات حلوة حالها حال وزير الحليو وبس، أي شي آخر ماكو، لا حساب لا كتاب ولا متابعة، والنوب جت شغلة النازحين ماي بارد على گلب الوزير (من غير ما يبلل قميصه ولا يخربط تسريحته) ، كل الخرابيط هسة صارت تحت بند النازحين واللاجئين إللي سكنوهم أو هم سكنوا نفسهم بالمدارس وكل تأخير بالمنهج صار برگبة المناطق إللي بيها الدعوشة والدعشنة .

ماكو كتب بالمدارس ....

إي مو النازحين بالبرد مال الشتا العام حرگوا الرحلات حتى يتدفون ، وبالصيف حتى يسوون بيتزا.

ماكو معلمين....

مو كلهم راحوا وي الحشد يقاتلون، هسة منو أهم نحارب الدعشنة لو الدراسة ؟

ماكو معلمات....

إي مو بعد ما راحوا الزلم وي الحشد ظلن يديرن البيت ويشيلن دبة الغاز على راسهن، خو البيت ما يظل خرابة !

ماكو إمتحانات

ماكو دوام

ماكو تربية ولا إحترام

وكلها يجيك الجواب : النازحين...داعش

بهاي شاطرين، كل واحد شايل بيده علبة مسامير وچاكوچ وتعاليگ، وين أكو خطأ أو مشكلة هو سببها، يطلع چم مسمار ويشتغل الدگ على الحيطان المجاورة، ويثبت التعاليگ حتى يعلگ أسباب المشكلة بحايط غيره، هو الحايط مالته جديد ومصبوغ وما يجوز يدگ عليه أي فشل أو مسمار.

وبعدين تعال أگول لك، آني أعرف إسم ' إقبال ' إسم إبنية، والدليل ست إقبال إللي چانت تجينا بالرياضة وچانت أسمن وحدة في قاطع عمليات تربية الرصافة، وما أعرف أكو عراقي إسمه إقبال، هذا الإسم رجالي بالهند لو پاكستان لو بنغلاديش لو شمال إيران أو القوقاز حتى سألوا أبو براء الشيشاني وراح ينطيكم أپروفال على كلامي ، وشاعر پاكستان الأكبر إسمه محمد إقبال (كان هندي بس بعد إعلان دولة پاكستان صار پاكستاني، وهواية راح نشوف هيچ شي عدنا، هسة هم عراقيين بس بعد چم سنة يصيرون سنستانيين أو شيعاستانيين أو كردستانيين أو حتى خضراوستانيين، وهي بقعة مباركة من أرض كانت تسمى العراق، نزل فيها أناس غرباء، فأكلوا كل شيء ثم زربوا على كل شيء بحسب ما مكتوب في موسوعة عربنجيديا عن خضراوستان. يعني هذا ال (إقبال ) مال وزارة التربية حيل واگف بالزردوم، أهووووووووووو هسة

يگولون حسد لأن حليو ! عشتووووووو ، عبالكم بس الممثل الحلو يخبل ! أشو مورگان فريمان زنجي قح ووجه مليان فالولة وتك إيد ما يشتغل وعين بيها حول أشوية ويخبل. آني حالي حال مورگان فريمان..كوپي پيست.

تعال شوف شلون يحلون المشاكل بوزارة التربية !

أكو رسوب هواية ؟

أوكي نسوي سنة عدم رسوب وهاي هي ! هسة الأمهات يشيلن إيدهن للسما ويشكرن الله ووزير التربية وداعش الخلافة.

المدارس ما تكفي ؟

أوكي ..نسوي الدوام ثلاث أوقات بكل مدرسة، صباحي وظهري وعصري وإحتمال مال المغرب همين هيچ مال كشخة.

ماكو إنترنت بالمدارس !

شنووووووووووووووو ! حضرة جنابك تصنف مووووو، د أكل خرة بالكلينكس أحسن لك.

ماكو تواليتات نظيفة بالمدارس ؟

ليش هي المدارس حتى تزرب بيها لو تتعلم بيها ؟ وبعدين مكان العلم مكان مقدس وحرام واحد يزرب بمكان مقدس !

ما أستفادينا من الدور الثاني !

مو مشلكة نسوي الدور الثالث

ما أستفادينا من الدور الثالث !

مو مشكلة نسوي الدور الرابع

ماكو فائدة من الدور الرابع !

إنچب ولك..عبالك راح أگول أكو الدور الخامس ! تفووووووووووو عليك، ترى آني ألوت منك، راح أحسبها سنة عدم رسوب ! وإذا تحچي أكثر راح ألغي هاي المادة وماكو داعي واحد يمتحن بيها .

يابة

خاطر الكائنات الأحادية الخلية والديناصورات، ترى الشغلة حيل واگفة، عبالك ذاك العضو بعد مال واحد ياخذله درزن فياگرا فول أوپشن.

الوضعية حيل عاجبتني...

الوضعية شهد

والله الموفج